فينك يا لميمة /الشاعر محمد دومو.. المغرب

فِينَكْ يا لْمَّيمَة!

(زجل مغربي)

فِينَكْ يَا لَمِّيمَة لَحنينة.

نْعاوَدْ ليكْ حكايتي اليُومَة

وفَينَهُومَا دُوكْ لَيَّامْ الزِينة

لِي عَشْناهَا معاك فداك الزْمَانْ

ايَّماتْنا كُلْها فَرْحة وفْرَاجة

والحَشمة والاحترام فَخْلاقْنا

كانت الگَلْسَة معاك نزاهة

وبْحُبك لَمْداومْ لينا والنْباهة

وبْتَدبيرَكْ الزين والرزانة

واليُومْ هَاني كَنْعيشْ البَهْدالة

لا أخلاقْ والناسْ وَلاَّتْ زَرْبانة

غِيرْ الجْرِي لْخاوي بْلا نهاية

مْشاتْ الحشمة معاك يا لميمة

وذْهبْ معاك لْمعقول يا لحنينة

رَجْعاتْ أيَامنا فْهادْ الزْمانْ تافهَة

مَا بْقاتْ حتى حاجة فيهْ صالْحَة

تَلْفاتْ النَّاسْ وَمْشاتْ لَفْراجَة

وضاعتْ القيم وصابْتْنَا الجَّايْحَة

-بقلم: محمد دومو

-المغرب