خيال المآتة /الشاعر دياب محمود حسن
خيال المآتة
**********
خيال المآتة
واقف زي الدادبان
على سطح البيت
بيحرس لنا الكتاكيت
بيخوف الغربان
والصقر ع التوتة
خايف يقرب منه
وخالت عليه الحدوتة
والتعلب المكار
جرى واستخبى
ورا الحيطان
لمَّا شافه واقف
بيحرس الغيطان
وزيه ناس كتير
شافوه في عز الليل
قاموا للناس يحكوا
ويقولوا فيه مواويل
قام شيخ القبيلة
قال أنا برده رحت عنده
وشفت إيده الطويلة
شافني وجري ورايا
وأديني من ساعتها
وأنا بحكي الحكاية
شبح طويل عريض
بيولد ويقدر يبيض
وعيونه بياضها صافي
وعاملة زي المراية
ومصلح الغفير
قال كلام كبير
إنه في ليلة شافه
نازل من القمر
والناس بلعوها
وما كدبوا الخبر
الناس فعلاً غريبة
بتألف الهوايل
وتقلب الحقيقة
الكدبة يصدقوها
ويقوموا يكبروها
في الثانية والدقيقة
وياما صنم صنعوه
وفضلوا يعبدوه
وسهروا الليل قدامه
وخافوا من عصيانه
وبعدين بإيديهم قاموا
خنقوه
بيخاف من شخص واحد
كتير من البلاد
يسيبوه يحكم ويرسم
في مصاير العباد
وبعد خراب بيوتهم
الكل قال وعاد
ياريتنا وقفنا له
وخدنا منه حصانه
كل ده حصل
لمَّا سكتنا له
غرق السفينة
وجاب العيب علينا
ياما يا ناس بنسمع
كلام من الخلايق
وهم واحنا نصدق
إنه من الحقايق
وياما شعوب خايفة
وماشية تاتا تاتا
وكل اللي في خيالها
يادوب خيال مآتة
دياب محمود حسن
تعليقات
إرسال تعليق